Ja horch amol, oder besser gsogt horch*sie und er und divers amol. Hob`n mir werkli nechs bessers zu do, wie dies ganza „Gender-Gschmarri“. Etz hob i dich glott in der Zeitung glesen das sich der BR dodol blamiert hot. A Glatschn homs griegt, weil die Junga den Gender-Blodsinn net mitmachen wollerten. Nebendro wor dann gstanden, dos der Kättensägen-Jens seim 91-Johr ollden Nochborn an Balkn vo seiner Garage wegsegt hot, weil er nümmer aufn See schauer hot könner.

Der Kettesägen-Jens wor frühers amol a guter Fußboller, Sogar Dorwart wora, in der Nadiolmonnschoft. Des ist sau indressand. Wie des Gender-Zeuch a. A. ehemoliger Grüna*ra, die die Claudi Stamm, net verwandt mir dera im blaun Kleidla aus Undergefragn, die hots ganz schö grissen als die Junga den Gender-Gschmarri net mitmachetern wollterten. Des Hicks*Sternla habns a net gwollt, unser Kinna! Und die Gesterner is a bled worn. Des is die wo uns frühers immer im ZDF immer dazült hot, wos so alles auf der Welt gschegn is. In Kiel, des liegt do ganz drumma irgendwo o der Ostsee, oder is des die Nordsee ? - ich wor jedenfolls schomol dort – es is etz a Drogendoter an ein „verstorbener Drogengebrauchender“. Also Der oder Die oder – ma was nimmer ob ma Weibla oder Männla is – hot irgendwos gfressen, gschnupft oder graucht, wos Er, Sie oder Divers net vertrogn hot.

Etz braugn mir ja scho drei verschiedener Aborten, auf gut fränkisch Schießhaüsla. Oder die annern vom erschten Fernseh senn ja a die dodolen Gnaller. Die ham doch glodd im Jungaprogromm „Funk“ aus am Bärn an „Veganer:innen“ gmacht. Freili, su a Bär frisst nadürlich Honich. Oba a nuch annersch Zeuch. Wie an Fisch z.B. om liebsten nadürli an Lachs. Den ess i a gern, wen er gut greuchert is. Suan Bärn is des übrigens wurst, ob er Männla, Weibla oder divers is. Dem „fiesen Frank“ und der Poppi wärts a wurst sa. Und dem Korl dem Grußen auch. Der hot immer nuch mit am Virus zu do. Gut nocht und nechs für ungut.