Horch amol, der Korl is grong. Hob i grod glesn. Gorona hot er, sogt er. Und ihn hauts ganz schö rümm. Obwohl er ja unna Gsundheitsminster is, scho vier mol gimpft sa söll und immer sei Maskn aufhot.
Etz haut er si angebli „Paxlovid“ nei, ab Pilln gecha Gorona die eigentli blos die schluggen sölln, die net gimpft senn. Oder ebn die an oder mehra Risigofaktorn hob. Also die zu dick senn oder an Zucker hobn oder zu viel Druck in der Blutbohn.
Zu dick is er net, der Korl, ein Zucker und Solz frisst er a net und ob er an Bluthochdruck hot, was i nett, konn ober gut sa wecha dem Gschmarri des er jeden Doch luslässt. Amend is er ja oba a gor net gimpft und segt des blos, weil er sei Impfsuppn losbrenga will, die er zuviel bstellt hot ?

Jedenfolls is er etz daham eigsperrt, in Garandäne und döff nimmer naus, bis er nimmer bosidiv is.

Vielleicht söllert der Korl Wilhelm ja mol a Bier saufen. Der FD hot am Samsdoch nei der Zeitung gschribn, das as Bier aus der Fränkischen Schweiz der anziche wirksame Impfstoff gecha Gorona ist. Des is gsund, desinfiziert den Körper auf alles wos do net neigehört.

Ich hobs ja letzts Johr a scho mol gschribn. Könnt a do noch lesen: Eilmeldung - Neuer Corona-Impfstoff aus Waischenfeld
Also dann Prost Korl, auf dasst bal widder gsund werst !